ಅ.23 ಕ್ಕೆ ಶ್ರಾವ್ಯ ಬಿ.ಎಸ್. ರಂಗಪ್ರವೇಶ
ಮಂಗಳೂರು: ಬಹುಮುಖಿ ಪ್ರತಿಭೆಯಾಗಿ ಈಗಾಗಲೇ ರಾಜ್ಯ ಮತ್ತು ರಾಷ್ಟ್ರಮಟ್ಟದಲ್ಲಿ ಸಾಧನೆಗೈದಿರುವ ಶ್ರಾವ್ಯ ಬಿ.ಎಸ್.ಅವರು ಭರತನಾಟ್ಯ ರಂಗಪ್ರವೇಶಕ್ಕೆ ಸಜ್ಜಾಗಿದ್ದು, ಅ.23 ರಂದು ಮಂಗಳೂರಿನ ಪುರಭವನದಲ್ಲಿ ಗಣ್ಯರ ಉಪಸ್ಥಿತಿಯಲ್ಲಿ ಅವರು ರಂಗಪ್ರವೇಶಗೈಯ್ಯಲಿದ್ದಾರೆ. ಅಂದು ಸಂಜೆ 5.30 ಕ್ಕೆ ಪುರಭವನದಲ್ಲಿ ನಡೆಯುವ ಈ ಕಾರ್ಯಕ್ರಮದಲ್ಲಿ ಕೊಂಡೆವೂರು ಶ್ರೀ ನಿತ್ಯಾನಂದಾಶ್ರಮದ ಪೂಜ್ಯ ಶ್ರೀ ಶ್ರೀ ಯೋಗಾನಂದ ಸರಸ್ವತೀ ಸ್ವಾಮೀಜಿ ಆಶೀರ್ವಚನಗೈಯ್ಯಲಿದ್ದಾರೆ. ಗೌರವ ಅತಿಥಿಗಳಾಗಿ ಕರ್ನಾಟಕ ಕಲಾ ತಿಲಕ ಮತ್ತು ನಾಟ್ಯರಾಣಿ ಶಾಂತಲಾ ಪುರಸ್ಕಾರ ಪಡೆದ ಗುರು ಉಳ್ಳಾಲ ಮೋಹನ್ ಕುಮಾರ್ ಮತ್ತು ಆಳ್ವಾಸ್ ಎಜುಕೇಶನ್ ಫೌಂಡೇಶನ್‌ನ ಅಧ್ಯಕ್ಷರಾದ ಡಾ.ಮೋಹನ್ ಆಳ್ವಾ ಅವರು ಭಾಗವಹಿಸಲಿದ್ದಾರೆ. ತನ್ನ ಎರಡನೇ ವಯಸ್ಸಿನಲ್ಲಿಯೇ ಭರತನಾಟ್ಯ ಅಭ್ಯಾಸದಲ್ಲಿ ತೊಡಗಿದ ಶ್ರಾವ್ಯ 5ನೇ ವಯಸ್ಸಿನಲ್ಲಿ ಗುರು ವಿದ್ವಾನ್ ಯು.ಕೆ. ಪ್ರವೀಣ್ ಅವರ ಮಾರ್ಗದರ್ಶನದಲ್ಲಿ ಭರತನಾಟ್ಯದ ಔಪಚಾರಿಕ ತರಬೇತಿಗೆ ಪ್ರವೇಶಿಸಿದರು. ಬಳಿಕ ಮಂಗಳೂರಿನ ಸೌರಭ ಸಂಗೀತ, ನೃತ್ಯ, ಕಲಾ ಪರಿಷತ್‌ನ ನಿರ್ದೇಶಕರಾದ ಗುರು ಡಾ. ಶ್ರೀವಿದ್ಯಾ ಅವರ ಸೌಮ್ಯ ಹಾಗೂ ಸಮರ್ಥ ಮಾರ್ಗದರ್ಶನದಲ್ಲಿ ಅವರ ಕಲಾಯಾನ ಮತ್ತಷ್ಟು ಅರಳಿತು. ಅವರ ಕಲೆಯ ಪಯಣ ನೃತ್ಯಕ್ಕಷ್ಟೇ ಸೀಮಿತವಾಗಿಲ್ಲ. ಸಂಗೀತ ಮತ್ತು ಚಿತ್ರಕಲೆಯಲ್ಲಿಯೂ ಸಹಜ ಆಸಕ್ತಿಯನ್ನು ಹೊಂದಿರುವ ಶ್ರಾವ್ಯ ಭರತನಾಟ್ಯದ ಜೊತೆಗೆ ಕರ್ನಾಟಕ ಶಾಸ್ತ್ರೀಯ ಸಂಗೀತವನ್ನೂ ಅಭ್ಯಾಸ ಮಾಡಿದ್ದು, ಡಾ. ಗಂಗೂಬಾಯಿ ಹಾನಗಲ್ ಸಂಗೀತ ಮತ್ತು ಪ್ರದರ್ಶಕ ಕಲೆಗಳ ವಿಶ್ವವಿದ್ಯಾಲಯ ನಡೆಸುವ ಪ್ರೀ-ವಿದ್ವತ್ ಪರೀಕ್ಷೆಯಲ್ಲಿ ಹಾಗೂ ಕೆಎಸ್‌ಇಇಬಿ ನಡೆಸುವ ಕರ್ನಾಟಕ ಶಾಸ್ತ್ರೀಯ ಸಂಗೀತದ ಜೂನಿಯರ್ ಗ್ರೇಡ್ ಪರೀಕ್ಷೆಯಲ್ಲಿ ಯಶಸ್ವಿಯಾಗಿ ಉತ್ತೀರ್ಣಳಾಗಿದ್ದಾರೆ. ಈ ತರಬೇತಿಯನ್ನು ಉಷಾ ಪ್ರವೀಣ್ ಅವರ ಮಾರ್ಗದರ್ಶನದಲ್ಲಿ ಪಡೆದಿದ್ದಾರೆ. ಮೈಸೂರು ಅರಮನೆಯಿಂದ ರಾಷ್ಟ್ರಮಟ್ಟಕ್ಕೆ: ಮೈಸೂರು ಅರಮನೆಯಂತಹ ಪ್ರತಿಷ್ಠಿತ ವೇದಿಕೆಗಳಲ್ಲಿ ತನ್ನ ಕಲೆಯನ್ನು ಪ್ರಸ್ತುತಪಡಿಸುವ ಅವಕಾಶವನ್ನು ಪಡೆದ ಶ್ರಾವ್ಯ, ಸೌರಭ ತಂಡದೊಂದಿಗೆ ಮೌಂಟ್ ಅಬುವಿನ ಗ್ಲೋಬಲ್ ಸಮಿಟ್, ನೃತ್ಯ ಸ್ಪಟಿಕ, ಆಳ್ವಾಸ್ ಜಾಂಬೂರಿ ಉತ್ಸವ, ಮಡಿಕೇರಿ ದಸರಾ, ಜೆ.ಸಿ. ಸಪ್ತಾಹ ಹಾಗೂ ಅಬ್ಬಕ್ಕೋತ್ಸವ ಸೇರಿದಂತೆ ಹಲವಾರು ಪ್ರತಿಷ್ಠಿತ ವೇದಿಕೆಗಳಲ್ಲಿ ಪಾಲ್ಗೊಂಡು ತನ್ನ ಪ್ರತಿಭೆಯನ್ನು ಪ್ರದರ್ಶಿಸಿದ್ದಾರೆ. ಪೃಥ್ವಿ, ಶೇಡ್ಸ್ ಆಫ್ ಶ್ಯಾಮ, ಶ್ರೀ ರಾಮಾಯಣ ದರ್ಶನಂ, ಕರ್ನಾಟಕ ಸಂಭ್ರಮ ಮತ್ತು ಶ್ರೀನಿವಾಸ ಕಲ್ಯಾಣ ಮುಂತಾದ ಮನಮುಟ್ಟುವ ನೃತ್ಯ ರೂಪಕಗಳಲ್ಲಿಯೂ ಭಾಗವಹಿಸಿದ್ದಾರೆ. ಪ್ರತಿಯೊಂದು ಪಾತ್ರವನ್ನು ಜೀವಂತಗೊಳಿಸುವ ಮೂಲಕ ಹಾಗೂ ಪ್ರತಿಯೊಂದು ಕಥೆಯನ್ನು ನೃತ್ಯದ ಮೂಲಕ ಪ್ರೇಕ್ಷಕರ ಮುಂದಿಡುವ ಮೂಲಕ ತನ್ನ ಕಲಾನುಭವವನ್ನು ಮತ್ತಷ್ಟು ಶ್ರೀಮಂತಗೊಳಿಸಿಕೊಂಡಿದ್ದಾರೆ. 2005 ರ ಜ.23 ರಂದು ಜನಿಸಿದ ಶ್ರಾವ್ಯ ಕಾಸರಗೋಡು ತಾಲೂಕಿನ ಉಪ್ಪಳ ಬಳಿಯ ಬಜೆ ಕುಟುಂಬದ ಶ್ರೀಕೃಷ್ಣಮಯ್ಯ ಹಾಗೂ ಬಬಿತಾ ಕೃಷ್ಣಮಯ್ಯ ದಂಪತಿಗಳ ಪುತ್ರಿಯಾಗಿದ್ದಾರೆ. ರಂಗಪ್ರವೇಶ ಎಂದರೆ ಕೇವಲ ರಂಗಪ್ರವೇಶವಲ್ಲ. ಅದು ವರ್ಷಗಳ ಸಾಧನೆಯ ಪುಷ್ಪಿಸುವ ಕ್ಷಣ, ಶಿಸ್ತು ಮತ್ತು ಭಕ್ತಿಯ ಪರಿಪೂರ್ಣತೆ, ಮತ್ತು ಪರಮಾತ್ಮನ ಪಾದಾರವಿಂದಗಳಿಗೆ ಸಮರ್ಪಿಸುವ ಒಂದು ಪವಿತ್ರ ಅರ್ಪಣೆ. ಹೃದಯದಲ್ಲಿ ಕೃತಜ್ಞತೆಯನ್ನು ಹೊತ್ತು, ಆತ್ಮದಲ್ಲಿ ನಟರಾಜನನ್ನು ನೆಲೆಗೊಳಿಸಿಕೊಂಡು, ಶ್ರಾವ್ಯ ತನ್ನ ವರ್ಷಗಳ ಕಲಿಕೆ, ಸಾಧನೆ ಮತ್ತು ಸಮರ್ಪಣೆಯ ಫಲವನ್ನು ರಂಗದ ಮೇಲೆ ಅರ್ಪಿಸಲು ಇದೀಗ ಹೆಜ್ಜೆ ಇಡುತ್ತಿದ್ದಾರೆ. ಅನನ್ಯ ಪ್ರತಿಭೆಗೆ ರಾಷ್ಟ್ರಮಟ್ಟದಲ್ಲಿ ಮನ್ನಣೆ: ಈಗಾಗಲೇ ಶ್ರಾವ್ಯ ಪಡೆದಿರುವ ಪ್ರಶಸ್ತಿ , ಪುರಸ್ಕಾರಗಳು ಆಕೆಯ ಅಸಾಮಾನ್ಯ ಪ್ರತಿಭೆಯನ್ನು ಅನಾವರಣಗೊಳಿಸಿದೆ. ಧಾರವಾಡದ ಕರ್ನಾಟಕ ಬಾಲವಿಕಾಸ ಅಕಾಡೆಮಿಯ ಅಕಾಡೆಮಿ ಬಾಲ ಗೌರವ ಪ್ರಶಸ್ತಿ, ತಿರುವನಂತಪುರಂನಲ್ಲಿ ನಡೆದ ಅನಂತಪುರಿ ಇಂಟರ್‌ನ್ಯಾಷನಲ್ ಕ್ಲಾಸಿಕಲ್ ಡ್ಯಾನ್ಸ್ ಫೆಸ್ಟಿವಲ್‌ನಲ್ಲಿ ನೃತ್ಯ ಗುಣಶ್ರೀ, ಬೆಂಗಳೂರಿನಲ್ಲಿ ನಡೆದ ಮಣಿಕರ್ಣಿಕಾ ನೃತ್ಯ ಉತ್ಸವದಲ್ಲಿ ನೃತ್ಯ ಮಾಣಿಕ್ಯ ಸಮ್ಮಾನ್, ಹೊಸದಿಲ್ಲಿಯ ವಿಶಾರದ ಕಲಾ ಉತ್ಸವದಲ್ಲಿ ನೃತ್ಯಶ್ರೀ, ಕತಾರ್‌ನ ದೋಹಾದಲ್ಲಿ ನಾದಂ ಸಿಲ್ಕ್ಸ್ ಡೆವಲಪ್‌ಮೆಂಟ್ ಸೆಂಟರ್‌ನಿಂದ ನಾಟ್ಯ ಬಾಲ ಕಲಾಮಣಿ ಪುರಸ್ಕಾರ, ಚನ್ನರಾಯಪಟ್ಟಣದ ನ್ಯಾಷನಲ್ ಕ್ಲಾಸಿಕಲ್ ಡ್ಯಾನ್ಸ್ ಅಕಾಡೆಮಿಯಿಂದ ನಾಟ್ಯ ನಿನಾದ ರಾಷ್ಟ್ರೀಯ ಪ್ರಶಸ್ತಿ, ಬೆಂಗಳೂರಿನ ನಂದಗೋಕುಲ ಡ್ಯಾನ್ಸ್ ಸ್ಕೂಲ್‌ನಿಂದ ನಾಟ್ಯ ಕಲಾಮಣಿ ಪ್ರಶಸ್ತಿ, ಬೆಂಗಳೂರಿನ ಝೇಂಕಾರದಿಂದ ಶ್ರೀ ಕಲಾಪೂರ್ಣ ಪ್ರಶಸ್ತಿ, ಅಸ್ಸಾಮಿನ ವಿಶ್ವವಿಖ್ಯಾತ ಕಾಮಾಖ್ಯ ಉತ್ಸವದಲ್ಲಿ ಅತ್ಯುತ್ತಮ ಪ್ರಶಸ್ತಿ, ಒಡಿಶಾದ ರಿದಮ್ ಕಲ್ಚರಲ್ ಸೆಂಟರ್‌ನಲ್ಲಿ ಭರತನಾಟ್ಯದ ಸೀನಿಯರ್ ವಿಭಾಗದಲ್ಲಿ ಪ್ರಥಮ ಬಹುಮಾನ, ಗೋವಾದಲ್ಲಿ ನಡೆದ ರಾಷ್ಟ್ರೀಯ ಮಟ್ಟದ ನೃತ್ಯ ಚಾಂಪಿಯನ್‌ ಶಿಪ್‌ನಲ್ಲಿ ದ್ವಿತೀಯ ಬಹುಮಾನ ಶ್ರಾವ್ಯಾ ಅವರ ಪ್ರತಿಭೆಯನ್ನು ಸಾರಿ ಹೇಳಿವೆ.
