ಮೂಡುಬಿದಿರೆ ವೈದ್ಯರ ಸಂಘ ಪದಾಧಿಕಾರಿಗಳ ಪದಗ್ರಹಣ ಸಮಾರಂಭ
Published Date: 02-Sep-2024 Link-Copied
ಮೂಡುಬಿದಿರೆ: ವೈದ್ಯರ ಸಂಘ ಮೂಡುಬಿದಿರೆ ಇದರ 2024-25ನೇ ಸಾಲಿನ ಅಧ್ಯಕ್ಷ ಜೈನ್ ಮೆಡಿಕಲ್ ಸೆಂಟರ್ ನ ಡಾ. ಮಹಾವೀರ ಜೈನ್ ಮತ್ತು ಪದಾಧಿಕಾರಿಗಳ ಪದಗ್ರಹಣ ಸಮಾರಂಭವು ಆ. 28ರ0ದು ನಿಶ್ಮಿತಾ ಟವರ್ಸ್ ನ ಪ್ಯಾರಡೈಸ್ ಹಾಲ್ ನಲ್ಲಿ ಜರಗಿತು. ಪದಗ್ರಹಣ ಅಧಿಕಾರಿಯಾಗಿದ್ದ ಮೂಡುಬಿದಿರೆಯ ಹಿರಿಯ ವೈದ್ಯ ಡಾ. ಹರೀಶ್ ನಾಯಕ್ ನೂತನ ಪದಾಧಿಕಾರಿಗಳ ಪದಗ್ರಹಣ ನೆರವೇರಿಸಿದರು. ಈ ಸಂದರ್ಭ ಮಾತನಾಡಿದ ಅವರು 1992ರಲ್ಲಿ ಮೂಡುಬಿದಿರೆಯಲ್ಲಿ ವೈದ್ಯರ ಸಂಘ ಪ್ರಾರಂಭಗೊಂಡು ಅಂದು ಪ್ರಥಮ ವರ್ಷದ ಪದಾಧಿಕಾರಿಗಳ ಪದಗ್ರಹಣ ಅಧಿಕಾರಿಯಾಗಿ ಡಾ. ಬಿ.ಎಂ. ಹೆಗ್ಡೆಯವರು ಆಗಮಿಸಿದ್ದದನ್ನು ಸ್ಮರಿಸಿದರಲ್ಲದೆ ನೂತನ ಪದಾಧಿಕಾರಿಗಳಿಗೆ ಶುಭ ಹಾರೈಸಿದರು. ನೂತನ ಅಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸಿದ ಡಾ. ಮಹಾವೀರ ಜೈನ್ ಅವರು ಕೋಲ್ಕತಾ ಅತ್ಯಾಚಾರ ಮತ್ತು ಹತ್ಯೆ ಪ್ರಕರಣದಲ್ಲಿ ಜೀವತೆತ್ತ ವೈದ್ಯ ವಿದ್ಯಾರ್ಥಿನಿಗೆ ಸಂತಾಪ ಸೂಚಿಸಿದರಲ್ಲದೆ ಮುಂದಿನ ಒಂದು ವರ್ಷದ ಸಂಘದ ಯೋಜನೆಗಳ ವಿವರ ನೀಡಿದರು. ನಿರ್ಗಮನ ಅಧ್ಯಕ್ಷೆ ಡಾ. ನಿವೇದಿತಾ ಕಿಣಿ, ನೂತನ ಕಾರ್ಯದರ್ಶಿ ಡಾ. ಪ್ರಶಾಂತ್ ರಾವ್, ಖಜಾಂಚಿ ಡಾ. ಸಮರ್ಥ್ ಭಟ್ ಉಪಸ್ಥಿತರಿದ್ದರು. ಡಾ. ಅಮರ್ ದೀಪ್ ನಿರೂಪಿಸಿದ ಕಾರ್ಯಕ್ರಮದಲ್ಲಿ ಡಾ. ಪ್ರಶಾಂತ್ ರಾವ್ ವಂದಿಸಿದರು.
